Hrein gólf stuðla að betra lofti í nánasta umhverfi okkar. Ryk og önnur óhreinindi þarf að hreinsa burt reglulega, annað hvort með því að ryksuga, fara yfir með rykmoppu eða þvo. En það fer að sjálfsögðu eftir tegund gólfefnis hvernig best er að bera sig að.

Helstu verkfæri og efni við þrif á gólfum: ryksuga, kústur, gólfklútur, þvegill, rykmoppa og gamli góði skrúbburinn.

Vaxbón (fast). Í því er leysiefnagrunnur og hentar vel á vinýl, kork, tré og jafnvel steinflísar. Borið á og nuddað með klút. Vaxbón endist lengi ef vandað er til verksins.
Vaxbón (fljótandi). Það hentar vel á sömu gólfefnategundir og fast bón en er auðveldara að vinna með. Vatnsuppleysanlegt bón. Má nota á allar tegundir gólfdúka og efna nema vinýl, lakkað tré og korkefni.
Bónuppleysir  Hann er nauðsynlegt að nota til að hreinsa burt eldri leyfar af bóni áður en bónað er að nýju.
Þvottaefni  Þar er úr mörgu að velja og fer eftir tegund gólfefnis hvað best á við þar. (Sjá neðar á síðunni). 

Algengustu tegundir gólfefnis:

Vinýll -  gólfdúkur er sterkur og endist lengi með góðri meðferð.
Þrif: Hreinsa ryk með því að sópa reglulega. Þvo með volgu sápuvatni og þvegli eða gólfklút. Ekki verra að fara yfir með hreinu vatni á eftir. Ef vinýldúkur er bónaður á að nota vatnsuppleysanlegt bón, alls ekki vaxbón. Ef blettir koma í dúkinn er ágætt að setja vatnsuppleysanlegt bón í klút og nudda blettinn. 

Línoleum - gólfdúkur eða flísar er slitsterkt gólfefni og er unnið úr náttúrulegum efnum, hörfræjarolíu (línolíu), sagi, trjákvoðu og kalksteini.
Þrif: Þvoið með mildri sápu (t.d. sápuspæni, ekki uppþvottalegi eða brúnsápu). Varist að bleyta gólfdúkinn um of, því það getur skemmt hann. Nota má vaxbón á línóleum gólfdúk, en gott að nota vatnsuppleysanlegt bón þar sem mæðir á með vatni. s.s. í eldhúsi og baði. Bletti og rákir má nudda með fínni stálull eða grófum svampi vættum í terpentínu. Ekki má nota bónuppleysi á línoleumdúk eða flísar.

Parkett - lakkað

Þrif: Sópið eða rykmoppið eftir þörfum. Þvoið með mildu sápuvatni og þurrvindið moppuna eða klútinn. Varast ber að láta vætu liggja á lökkuðu parkettgólfi. Nota má hvort heldur er vatnsuppleysanlegt eða vaxbón. En varast skal að bóna slík gólf oft. Ef lakkið er orðið slitið þarf að pússa gólfin upp og lakka að nýju.

Parkett - olíu- eða vaxborið

Þrif: Rykmoppa reglulega.Best er að nota grænsápu eða þar til gerða parkettsápu eða sápu sem er feit, því fitan mettar gólfborðin. Nauðsynlegt er að olíu eða vaxbera gólf nokkuð reglulega annars vilja þau þorna og verða mislit.

Parkett - plast
Þrif: Varast skal að bleyta mikið, þurfi þess á að nota volgt vatn og þurrka jafnóðum. Best er að strjúka yfir með þurri moppu eða ryksuga. 

Korkur er náttúrlegt gólfefni gert úr berki eikartrésins. Oftast í flísum og ýmist lakkaður, olíu- eða vaxborin.

Þrif: Sópa eða ryksuga. Þvoið með vel heitu sápuvatni. Gott að bóna með vaxbóni öðru hverju. Ef korkurinn er lakkaður skal nota volgt sápuvatn og þurrka yfir í lokin. 

Leirflísar eru mjög harðar og yfirborðið oft húðað.
Þrif: Uppþvottalögur er góður til að þvo leirflísar með. Mikil óhreinindi þarf að skrúbba burt. Fúgur þarf að þrífa sérstaklega með sterku sápuvatni og mjúkum bursta. Leirflísar má alls ekki bóna.Varist að skilja gólfin eftir blaut, þannig eru þau glerhál.  

Steinflísar eru oftast óhúðaðar og taka þar af leiðandi auðveldlega í sig óhreinindi.
Þrif: Best að strjúka reglulega yfir með þvegli og vatni með góðum hreinsilegi.  Einnig má skrúbba flísarnar með sterku sápuvatni og skola vel og þurrka á eftir. Nota má vaxbón (fast eða fljótandi), það gefur stamt yfirborð. Stálull og terpentína er gott að nota á bletti.
Þegar flísarnar eru nýjar er gott að bera á þær línolíu og þvo ekki fyrstu tvær vikurnar. 

Teppi og mottur eru ýmist úr gervi- eða náttúruefnum.
Þrif: Þarna dugar ryksugan oftast best. Teppi þarf líka að hreinsa af og til og best er að leigja sér tæki til þess þar sem teppalagt er horna á milli. Góð teppahreinsiefni eru fáanleg. Þau má líka nota á húsgögn. Varast skal að bleyta ullarteppi of mikið. Lausar mottur og dregla er gott að viðra og banka með teppabankara.
Mottur úr sísalhampi, kókostrefjum eða öðrum náttúrutrefjum er best að ryksuga. Ef þær eru  mjög óhreinar er ráð að þvo þær upp úr saltvatni, skola vel á eftir og þurrka við stofuhita. 

Gott ráð til að fríska upp teppi
Stráið matarsóda jafnt yfir teppið og látið liggja í 15-20 mínútur. Ryksugið vel að lokum. 

Að lokum: Munið að lofta reglulega vel út með því að opna glugga og svalahurðir upp á gátt (þ.e. ef veður leyfir slíkt) og helst þannig að trekki vel í gegnum hýbýlin.

Að eyða vondri lykt: Setjið vatn með smávegis af borðediki í skál og látið t.d. á miðstöðvarofn. sneiðar af sítrónu og safi gefa líka ferska lykt.